Kuwait Expatriates;കുവൈറ്റ് പ്രവാസികൾക്ക് മാത്രമായി അത്യാധുനിക ആശുപത്രികൾ സജ്ജമാകുന്നു; 6000 പേർക്ക് തൊഴിൽ അവസരം
Kuwait Expatriates:കുവൈറ്റ് സിറ്റി: കുവൈറ്റിലെ പ്രവാസികൾക്കും കുടുംബാംഗങ്ങൾക്കും മാത്രമായി ചികിത്സാ സംവിധാനം ഒരുക്കുന്നതിനായി സജ്ജീകരിക്കുന്ന ദമാന്‍ ആശുപത്രികളുടെ നിർമാണം അന്തിമ ഘട്ടത്തിൽ. ദമാൻ ഇൻഷുറൻസ് കമ്പനിയുടെ കീഴിൽ നിർമിക്കുന്ന ആശുപത്രികൾക്കായുള്ള കെട്ടിടങ്ങൾ ഇതിനകം ഒരുങ്ങിക്കഴിഞ്ഞു.
ഇവിടത്തെ ചികിൽസാ ഉപകരണങ്ങൾ ഉൾപ്പെടെയുള്ള അടിസ്ഥാന സൗകര്യങ്ങൾ ഒരുക്കുന്നതുമായി ബന്ധപ്പെട്ട് അഹമ്മദിയിലെ ആശുപത്രിയിലേയും ഫഹാഹീല്‍ ഹെൽത്ത് സെന്ററിലേയും സംവിധാനങ്ങൾ കഴിഞ്ഞ ദിവസം ദമാന്‍ അധികൃതര്‍ പരിശോധിച്ചു.സര്‍ക്കാര്‍- സ്വകാര്യമേഖല പങ്കാളിത്തത്തില്‍ പ്രവാസികളുടെ ചികിത്സക്കായി മിഡില്‍ ഈസ്റ്റിലെ തന്നെ ആദ്യത്തെ ആരോഗ്യ പരിപാലന സംവിധാനമാണ് ദമാന്‍ ആശുപത്രികൾ. മെഡിക്കല്‍ ലബോറട്ടറികള്‍, റേഡിയോളജി സെന്ററുകള്‍, ഫാര്‍മസ്യൂട്ടിക്കല്‍ സേവനങ്ങള്‍, ആംബുലന്‍സ്, മെഡിക്കല്‍ പരിശീലന സൗകര്യങ്ങള്‍ തുടങ്ങിയ സേവനങ്ങള്‍ ദമാൻ ആരോഗ്യ കേന്ദ്രങ്ങളിൽ ലഭ്യമാകും.
കുവൈറ്റിലെ വാർത്തകളും വിശേഷങ്ങളും അറിയാന്‍ വാട്സ്ആപ്പ് ലിങ്കില്‍ ക്ലിക്ക് ചെയ്യുക
https://chat.whatsapp.com/JKuxVMuEJsKD2PpJ7x6It8
ഹെല്‍ത്ത് കെയര്‍ ഫെസിലിറ്റിക്ക് ആവശ്യമായ എല്ലാ സൗകര്യങ്ങളും ഇവിടെ ഒരുക്കിയതായി മെഡിക്കല്‍ സര്‍വീസസ് ഡയറക്ടര്‍ ഡോ. അന്‍വര്‍ അല്‍ റഷീദ് പറഞ്ഞു. പദ്ധതി പൂര്‍ണ്ണമായും പ്രവര്‍ത്തനക്ഷമമാകുന്നതോടെ സ്വദേശികൾക്കും വിദേശികൾക്കും 6,000 തൊഴിലവസരങ്ങള്‍ സൃഷ്ടിക്കാന്‍ കഴിയുമെന്നാണ് പ്രതീക്ഷയെന്ന് ദമാന്‍ ഡയറക്ടര്‍ ബോര്‍ഡ് അംഗം ഖാലിദ് അല്‍ അബ്ദുള്‍ഗാനി പറഞ്ഞു.
രാജ്യത്ത് പുതുതായി ആരംഭിക്കുന്ന ആരോഗ്യ ഇന്‍ഷുറന്‍സ് ആശുപത്രികൾ പ്രവര്‍ത്തനക്ഷമമാകുന്നതോടെ സര്‍ക്കാര്‍ ആശുപത്രികളിലെ സമ്മര്‍ദ്ദവും തിരക്കും വലിയ തോതിൽ കുറയുമെന്നും അദ്ദേഹം പറഞ്ഞു. ഇന്‍ഷുറന്‍സ് കമ്പനിക്കു കീഴില്‍ രാജ്യവ്യാപകമായി 12 പ്രാഥമികാരോഗ്യ കേന്ദ്രങ്ങളും ഫഹാഹീലും ജഹ്റയിലുമായി രണ്ട് ആശുപത്രികളുമാണ് ഒരുങ്ങുന്നത്. സ്വകാര്യമേഖലയില്‍ ജോലി ചെയ്യുന്ന വിദേശികൾക്കും അവരുടെ കുടുംബങ്ങൾക്കും മികച്ച ആരോഗ്യ സേവനങ്ങൾ ഇവിടെ നിന്ന് ലഭിക്കും. കെട്ടിടം, ചുറ്റുപാടുകൾ, മെഡിക്കല്‍ ഉപകരണങ്ങള്‍, പ്രൊഫഷണല്‍, അഡ്മിനിസ്‌ട്രേറ്റീവ് ടെക്‌നിക്കല്‍ സ്റ്റാഫ് എന്നിവയുടെ കാര്യത്തില്‍ ഇത് അന്താരാഷ്ട്ര ആശുപത്രികളുമായി മത്സരിക്കും. എല്ലാ അത്യാധുനിക സൗകര്യങ്ങളുമുള്ള ആശപത്രികളും ക്ലിനിക്കുകളും ആണ് തയ്യാറാകുന്നതെന്നും ഇക്കാര്യത്തിൽ സ്വദേശികൾക്ക് പ്രവാസികളോട് അസൂയ തോന്നുന്ന സ്ഥിതിയുണ്ടാകുമെന്നും അദ്ദേഹം അഭിപ്രായപ്പെട്ടു.
ആശുപത്രിക്ക് ആവശ്യമായ ലൈസന്‍സുകള്‍ നേടുന്നതിന് ഇന്‍ഷുറന്‍സ് ആശുപത്രികളുടെ പ്രവര്‍ത്തന ശേഷിയുമായി ബന്ധപ്പെട്ട എല്ലാ കാര്യങ്ങളും അവലോകനം ചെയ്യുകയും ഓഡിറ്റ് ചെയ്യുകയും ചെയ്തിതിട്ടുണ്ട്. ഇതുമായി ബന്ധപ്പെട്ട 15 കമ്മിറ്റികള്‍ മുഖേന ഇന്‍ഷുറന്‍സ് ആശുപത്രികളുടെ എല്ലാ സൗകര്യങ്ങളും ഉപകരണങ്ങളും അധികാരികള്‍ പരിശോധിച്ച് അംഗീകരിച്ചിട്ടുണ്ടെന്നും മെഡിക്കല്‍ എന്‍ജിനീയറിങ് വിഭാഗം ഡയറക്ടര്‍ എന്‍ജിനീയര്‍ ഹുസൈന്‍ അല്‍ സായിഗ് വ്യക്തമാക്കി. കുവൈറ്റ് അമീറിൻ്റെ നിർദ്ദേശപ്രകാരം കുവൈറ്റ് 2035 ദേശീയ വികസന പദ്ധതിയില്‍ ഉള്‍പ്പെടുത്തിയാണ് പ്രവാസികൾക്കായി പ്രത്യേക ആരോഗ്യ സംവിധാനങ്ങൾ ഒരുക്കിയിരിക്കുന്നത്.
Comments (0)